ᠮᠣᠩᠭᠣᠯ ᠬᠡᠯᠡ ᠶᠠᠳᠠᠭᠤ ᠦᠦ︖
ᠳᠡᠯᠭᠡᠷᠡᠬᠦ
ᠮᠣᠩᠭᠣᠯ ᠬᠡᠯᠡ ᠶᠠᠳᠠᠭᠤ᠂ ᠨᠡᠷᠡ ᠲᠣᠮᠢᠶᠠ ᠬᠦᠷᠦᠯᠴᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠵᠦ ᠳᠠᠩᠳᠠ ᠶᠠᠷᠢᠳᠠᠭ᠃ ᠪᠡᠶᠡ ᠳᠠᠭᠠᠭᠠᠵᠤ ᠰᠡᠳᠬᠢᠳᠡᠭ᠂ ᠲᠣᠯᠣᠭᠠᠢ ᠪᠠᠨ ᠮᠡᠳᠡᠳᠡᠭ ᠦᠶᠡ ᠳᠦ ᠦᠭᠡ ᠶᠢᠨ ᠰᠠᠩ ᠬᠡᠵᠢᠶᠡ ᠴᠤ ᠬᠣᠮᠰᠠᠳᠠᠳᠠᠭ ᠦᠭᠡᠢ᠃ ᠦᠭᠡᠰ ᠦᠨ ᠰᠠᠩ ᠳᠤ ᠪᠠᠨ ᠡᠵᠡᠨ ᠰᠠᠭᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠪᠠᠢᠭᠠ ᠪᠠᠨ ᠪᠤᠶᠠᠨ ᠢᠶᠠᠨ ᠡᠳ᠋ᠯᠡᠵᠦ ᠴᠢᠳᠠᠬᠤ ᠦᠭᠡᠢ᠃ ᠮᠣᠩᠭᠣᠯᠴᠤᠳ ᠮᠠᠨᠳᠤᠵᠤ ᠪᠠᠢᠬᠤ ᠦᠶᠡ ᠳᠦ ᠪᠡᠨ ᠮᠣᠩᠭᠣᠯ ᠨᠤᠲᠤᠭ ᠲᠤ ᠪᠠᠢᠳᠠᠭ ᠦᠭᠡᠢ ᠠᠮᠢᠲᠠᠨ᠂ ᠤᠷᠭᠤᠮᠠᠯ᠂ ᠡᠳ᠋ ᠡᠷᠳᠡᠨᠢᠰ ᠲᠦ ᠬᠦᠷᠲᠡᠯᠡ ᠨᠡᠷᠡ ᠥᠭᠭᠦᠭᠡᠳ ᠯᠠ᠂ ᠣᠯᠵᠤ ᠠᠪᠤᠭᠠᠳ ᠡᠳ᠋ᠯᠡᠭᠡᠳ ᠯᠠ ᠪᠠᠢᠭᠰᠠᠨ᠃
ᠪᠤᠰᠤᠳ ᠤᠨ ᠬᠡᠯᠡ ᠶᠢ ᠬᠠᠷᠠᠵᠤ ᠣᠷᠴᠢᠭᠤᠯᠬᠤ ᠭᠡᠵᠦ ᠴᠥᠭᠡᠨ ᠬᠡᠳᠦᠨ ᠦᠭᠡᠨ ᠳᠣᠲᠣᠷᠠ ᠪᠠᠨ ᠡᠷᠭᠢᠯᠳᠦᠭᠡᠳ᠂ ᠨᠡᠷᠡ ᠥᠭᠬᠦ ᠤᠬᠠᠮᠰᠠᠷ ᠢᠶᠠᠨ ᠠᠯᠳᠠᠭᠰᠠᠨ ᠠᠴᠠ ᠪᠣᠯᠵᠤ ᠵᠦᠳᠡᠷᠡᠳᠡᠭ᠃
ᠵᠢᠱᠢᠶᠡ ᠪᠡᠷ ᠶᠠᠷᠢᠶᠠ᠃ ᠬᠢᠲᠠᠳ ᠢᠶᠠᠷ 打火机᠂ ᠣᠷᠣᠰ ᠢᠶᠠᠷ аигалка᠂ ᠠᠩᠭ᠍ᠯᠢ ᠪᠠᠷ lighter ᠭᠡᠳᠡᠭ ᠵᠦᠢᠯ ᠢ ᠮᠣᠩᠭᠣᠯ ᠢᠶᠠᠷ 《 ᠠᠰᠠᠭᠠᠭᠤᠷ 》 ᠭᠡᠳᠡᠭ ᠪᠣᠯᠵᠤ ᠪᠠᠢᠭᠠ ᠠᠵᠠᠢ᠃ ᠭᠡᠲᠡᠯᠡ ᠮᠣᠩᠭᠣᠯ ᠦᠭᠡᠨ ᠳᠦ ᠶᠠᠭ ᠣᠨᠣᠭᠠᠭᠰᠠᠨ《 ᠬᠡᠲᠡ 》 ᠭᠡᠳᠡᠭ ᠦᠭᠡ ᠪᠠᠢᠳᠠᠭ᠃ ᠰᠠᠶ᠋ᠢ ᠳᠤᠷᠠᠳᠤᠭᠰᠠᠨ ᠬᠢᠲᠠᠳ ᠣᠷᠣᠰ ᠠᠩᠭ᠍ᠯᠢ ᠶᠢᠨ ᠠᠯᠢ ᠨᠢ ᠴᠤ ᠣᠨᠣᠭᠠᠭᠰᠠᠨ ᠨᠡᠷᠡ ᠪᠢᠰᠢ᠃ ᠬᠡᠲᠡ ᠶᠢ ᠬᠢᠲᠠᠳ ᠢᠶᠠᠷ᠂ ᠭᠠᠯ ᠤᠨ ᠬᠠᠳᠤᠭᠤᠷ᠂ ᠠᠩᠭ᠍ᠯᠢ ᠪᠠᠷ ᠭᠠᠯ ᠴᠠᠬᠢᠭᠴᠢ᠂ ᠴᠠᠬᠢᠭᠤᠷ ᠬᠠᠪᠢᠷᠤᠭᠴᠢ ᠭᠡᠬᠦ ᠮᠠᠶ᠋ᠢᠭ ᠢᠶᠠᠷ ᠨᠡᠷᠡᠯᠡᠵᠦ ᠪᠠᠢᠨᠠ᠃ ᠬᠡᠲᠡ ᠭᠡᠳᠡᠭ ᠦᠭᠡ ᠪᠡᠨ ᠡᠨᠳᠡ ᠠᠰᠢᠭᠯᠠᠬᠤ ᠦᠭᠡᠢ ᠪᠣᠯ ᠬᠡᠵᠢᠶᠡ ᠴᠤ ᠠᠰᠢᠭᠯᠠᠬᠤ ᠦᠭᠡᠢ ᠪᠣᠯᠵᠤ᠂ ᠮᠣᠩᠭᠣᠯ ᠬᠡᠯᠡ ᠨᠢᠭᠡ ᠰᠢᠷᠬᠡᠭ ᠦᠭᠡ ᠪᠡᠷ ᠶᠠᠳᠠᠭᠤᠷᠠᠨᠠ᠃
隐形眼镜 ᠪᠤᠶᠤ contact lenses ᠢ 《 ᠴᠡᠴᠡᠭᠡᠢ ᠶᠢᠨ ᠰᠢᠯ 》 ᠭᠡᠬᠦ ᠳᠦ ᠪᠣᠯᠣᠨᠠ᠃ ᠮᠣᠩᠭᠣᠯ ᠤᠯᠤᠰ ᠲᠤ Контакт линз ᠭᠡᠵᠦ ᠪᠠᠢᠨᠠ᠃ ᠴᠡᠴᠡᠭᠡᠢ ᠶᠢᠨ ᠰᠢᠯ ᠡᠴᠡ ᠪᠡᠨ ᠲᠣᠪᠴᠢᠯᠠᠭᠠᠳ《 ᠴᠡᠴᠡᠭᠡᠢᠪᠴᠢ 》 ᠭᠡᠬᠦ ᠮᠡᠲᠦ ᠪᠣᠯᠭᠠᠵᠤ ᠴᠤ ᠪᠣᠯᠣᠨᠠ᠃
遥控器 ᠪᠤᠶᠤ remote control ᠢ ᠮᠣᠩᠭᠣᠯ ᠤᠯᠤᠰ ᠲᠤ 《 ᠠᠯᠤᠰ ᠤᠨ ᠤᠳᠤᠷᠢᠳᠤᠯᠭᠠ᠂ ᠤᠳᠤᠷᠢᠳᠤᠯᠭᠠ 》 ᠭᠡᠨᠡ᠃ ᠵᠢᠯᠣᠭᠣᠳᠬᠤ ᠬᠥᠲᠥᠯᠬᠦ ᠬᠡᠷᠡᠭᠰᠡᠯ ᠢ ᠵᠢᠯᠣᠭᠣ᠂ ᠴᠤᠯᠪᠤᠭᠤᠷ ᠭᠡᠬᠦ ᠦᠶᠡ ᠪᠤᠢ᠂ ᠲᠡᠷᠡ ᠪᠣᠯ ᠣᠢᠷᠠ ᠶᠢᠨ ᠤᠳᠤᠷᠢᠳᠤᠯᠭᠠ᠂ ᠵᠢᠭᠠᠬᠠᠨ ᠢᠯᠡᠭᠦᠦ ᠵᠠᠢ ᠠᠴᠠ ᠵᠢᠯᠣᠭᠣᠳᠬᠤ ᠦᠶᠡ ᠳᠦ 《 ᠳᠡᠯᠪᠡᠭᠡ 》 ᠭᠡᠳᠡᠭ ᠦᠭᠡ ᠬᠡᠷᠡᠭᠯᠡᠳᠡᠭ ᠢ ᠰᠠᠨᠠᠭᠠᠳ᠂ ᠠᠯᠤᠰ ᠠᠴᠠ ᠤᠳᠤᠷᠢᠳᠬᠤ ᠪᠠᠭᠠᠵᠢ ᠶᠢ ᠨᠢ ᠳᠡᠯᠪᠡᠭᠡ ᠭᠡᠳ᠂ ᠤᠳᠤᠷᠢᠳᠬᠤ ᠦᠢᠯᠡᠳᠦᠯ ᠬᠢᠬᠦ ᠶᠢ ᠨᠢ ᠳᠡᠯᠪᠡᠬᠦ ᠭᠡᠪᠡᠯ ᠮᠣᠩᠭᠣᠯ ᠬᠡᠯᠡ ᠪᠡᠷ ᠢᠶᠡᠨ ᠢᠯᠡᠳᠬᠡᠴᠢᠬᠡᠨᠡ᠃
抛物线 ᠪᠤᠶᠤ parabola ᠶᠢ ᠮᠣᠩᠭᠣᠯ ᠤᠯᠤᠰ ᠲᠤ ᠲᠡᠭᠦᠨ ᠢ ᠨᠢ ᠺᠢᠷᠢᠯᠯ ᠢᠶᠡᠷ ᠭᠠᠯᠢᠭᠯᠠᠭᠠᠳ ᠶᠠᠪᠤᠵᠤ ᠪᠠᠢᠭᠠ ᠪᠣᠯ᠂ ᠥᠪᠥᠷ ᠮᠣᠩᠭᠣᠯ ᠳᠤ 《 ᠬᠠᠶᠠᠯᠲᠠ ᠶᠢᠨ ᠱᠤᠭᠤᠮ 》 ᠡᠨᠡ ᠲᠡᠷᠡ ᠭᠡᠬᠦ ᠵᠢᠱᠢᠶᠡ ᠲᠡᠢ᠃ ᠳᠠᠶ᠋ᠢᠯᠬᠤ ( даялах) ᠭᠡᠵᠦ᠂ ᠳᠤᠭᠤᠢᠷᠠᠭᠤᠯᠤᠨ᠂ ᠨᠤᠮᠤᠨ ᠬᠡᠯᠪᠡᠷᠢ ᠪᠡᠷ ᠬᠥᠳᠡᠯᠬᠦ᠂ ᠬᠥᠳᠡᠯᠭᠡᠬᠦ ᠶᠢ ᠬᠡᠯᠡᠳᠡᠭ᠂ 《 ᠳᠠᠶ᠋ᠢᠯᠤᠯᠲᠠ᠂ ᠳᠠᠶ᠋ᠢᠯᠤᠯ 》 ᠭᠡᠪᠡᠯ᠂ ᠭᠠᠳᠠᠭᠠᠳᠤ ᠦᠭᠡ ᠬᠡᠷᠡᠭᠯᠡᠬᠦ ᠦᠭᠡᠢ ᠳᠦ ᠪᠣᠯᠣᠨᠠ᠃
醋 ᠪᠤᠶᠤ vinegar ᠢ ᠮᠣᠩᠭᠣᠯ ᠢᠶᠠᠷ《 ᠰᠢᠷᠬᠡ᠂ ширх 》 ᠭᠡᠵᠦ ᠪᠠᠢᠭᠰᠠᠨ ᠢ ᠳᠤᠮᠳᠠᠳᠤ ᠵᠠᠭᠤᠨ ᠤ ᠲᠣᠯᠢ ᠪᠢᠴᠢᠭ ᠲᠦ ᠲᠡᠮᠳᠡᠭᠯᠡᠵᠦ ᠪᠠᠢᠳᠠᠭ᠃《 ᠼᠤᠤ 》 ᠭᠡᠳᠡᠭ ᠬᠢᠲᠠᠳ ᠦᠭᠡ ᠶᠢ ᠬᠡᠷᠡᠭᠯᠡᠬᠦ ᠠᠯᠪᠠ ᠦᠭᠡᠢ᠃
ᠵᠠᠯᠬᠠᠭᠤ ᠶᠢᠨ ᠤᠷᠰᠢᠭ ᠢᠶᠠᠷ ᠶᠠᠳᠠᠭᠤ ᠪᠣᠯᠳᠠᠭ᠃ ᠮᠣᠩᠭᠣᠯ ᠦᠭᠡᠰ ᠦᠨ ᠰᠠᠩ ᠪᠠᠶᠠᠨ ᠪᠣᠯᠪᠠᠴᠤ᠂ ᠡᠷᠢᠵᠦ ᠬᠠᠢᠬᠤ ᠠᠴᠠ ᠪᠠᠨ ᠵᠠᠯᠬᠠᠭᠤᠷᠠᠭᠠᠳ᠂ ᠣᠢᠷᠠ ᠬᠠᠪᠢ ᠶᠢᠨ ᠢᠶᠡᠷ ᠢᠶᠡᠨ ᠪᠡᠯᠡᠨᠴᠢᠯᠡᠭᠡᠳ ᠪᠠᠢᠪᠠᠯ᠂ ᠭᠠᠷ ᠮᠡᠬᠦᠰ ᠭᠠᠨᠵᠤᠭᠠ ᠲᠠᠲᠠᠭᠤ ᠪᠣᠯᠬᠤ ᠠᠴᠠ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠢᠯᠡ᠃
Гэрэгэ ᠭᠡᠬᠦ ᠨᠡᠷᠡ ᠲᠣᠮᠢᠶᠠ ᠡᠨᠳᠡ ᠲᠡᠨᠳᠡ ᠦᠭᠡᠢ ᠴᠣᠬᠢᠵᠤ ᠶᠠᠪᠤᠳᠠᠭ ᠪᠣᠯᠣᠯᠠ᠃ ᠺᠢᠷᠢᠯᠯ ᠪᠢᠴᠢᠭ ᠲᠦ ᠡᠢᠮᠦ ᠪᠢᠴᠢᠯᠭᠡ ᠲᠡᠢ ᠦᠭᠡ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠶᠤᠮ᠂ ᠶᠠᠭᠤ ᠪᠣᠯᠪᠠ︖ ᠭᠡᠰᠡᠨ ᠴᠢᠨᠢ᠂ 《 ᠬᠡᠷᠡᠭᠡ᠂ хэрээ 》 ᠭᠡᠵᠦ ᠭᠡᠵᠦ ᠬᠠᠭᠤᠴᠢᠨ ᠪᠢᠴᠢᠭ ᠲᠦ ᠪᠠᠢᠳᠠᠭ ᠢ ᠪᠤᠷᠤᠭᠤ ᠳᠠᠭᠤᠳᠠᠭᠠᠳ᠂ ᠪᠠᠰᠠ ᠪᠤᠷᠤᠭᠤ ᠣᠢᠯᠠᠭᠠᠭᠠᠳ ᠶᠠᠪᠤᠵᠤ ᠪᠤᠢ ᠨᠢ ᠲᠡᠷᠡ ᠠᠵᠠᠢ᠃︽ ᠬᠡᠷᠡᠭᠡ︾ ᠭᠡᠵᠦ ᠫᠠᠢᠰᠠ ᠶᠢ ᠬᠡᠯᠡᠨᠡ᠂ ᠡᠭᠡᠯᠵᠢ᠂ ᠬᠠᠯᠠᠭᠠ᠂ ᠵᠢᠵᠢᠭᠦᠷ ᠢ ᠴᠤ ᠬᠡᠯᠡᠨᠡ᠃ ᠲᠡᠷᠡ ᠫᠠᠢᠰᠠ ᠪᠠᠨ ᠪᠠᠷᠢᠭᠠᠳ ᠡᠭᠡᠯᠵᠢ ᠬᠠᠯᠠᠭᠠ ᠪᠠᠨ ᠠᠪᠳᠠᠭ᠂ ᠭᠡᠷᠡᠴᠢ ᠲᠡᠮᠳᠡᠭ᠂ ᠢᠲᠡᠭᠡᠮᠵᠢᠯᠡᠬᠦ ᠪᠢᠴᠢᠭ ᠪᠣᠯᠭᠠᠳᠠᠭ ᠪᠠᠢᠵᠠᠢ᠃ ᠶᠠᠭᠤᠨ гэрээ ᠪᠢᠯᠡ᠂ ᠵᠦᠭᠡᠷ ᠯᠠ хэрээ ᠭᠡᠵᠦ ᠪᠠᠢ᠂ ᠡᠨᠡ ᠪᠣᠯ ᠬᠠᠭᠤᠴᠢᠨ ᠮᠣᠩᠭᠣᠯ ᠪᠢᠴᠢᠭ ᠢᠶᠡᠨ ᠰᠠᠢᠨ ᠮᠡᠳᠡᠬᠦ ᠦᠭᠡᠢ᠂ ᠰᠤᠷᠪᠤᠯᠵᠢ ᠰᠤᠳᠤᠷ ᠢᠶᠠᠨ ᠠᠰᠢᠭᠯᠠᠳᠠᠭ ᠦᠭᠡᠢ ᠶᠢᠨ ᠭᠠᠢ᠃
. ᠭᠡᠲᠡᠯᠡ︽ ᠮᠣᠩᠭᠣᠯ ᠬᠡᠯᠡᠨ ᠦ ᠳᠡᠯᠭᠡᠷᠡᠩᠭᠦᠢ ᠲᠠᠢᠯᠪᠤᠷᠢ ᠲᠣᠯᠢ︾ ᠳᠦ[хуучирсан] Албан тушаалтан, цэргийн ноёд, элчин нарт олгож байсан алт, мөнгөн пайз. ᠭᠡᠵᠦ ᠲᠠᠢᠯᠪᠤᠷᠢᠯᠠᠭᠰᠠᠨ ᠭᠠᠵᠠᠷ ᠪᠠᠰᠠ ᠪᠠᠢᠨᠠ᠃ хэрээ ᠭᠡᠬᠦ ᠳᠠᠭᠤᠳᠠᠯᠭᠠ ᠪᠠᠷ ᠨᠢ ᠪᠣᠯ᠂ ᠬᠣᠷᠴᠢᠨ ᠳᠤ︽ ᠡᠭᠡᠯᠵᠢ᠂ ᠬᠠᠯᠠᠭᠠ᠂ ᠵᠢᠵᠢᠭᠦᠷ︾ ᠭᠡᠬᠦ ᠤᠳᠬᠠ ᠪᠠᠷ ᠶᠠᠷᠢᠳᠠᠭ ᠭᠡᠬᠦ ᠤᠬᠠᠭᠠᠨ ᠲᠠᠢ ᠲᠠᠢᠯᠪᠤᠷᠢ ᠬᠢᠭᠰᠡᠨ ᠪᠠᠢᠨᠠ᠃
ᠡᠨᠡ ᠨᠢ ᠴᠤ ᠶᠠᠭᠠᠬᠢᠬᠤ ᠪᠣᠢ᠂ ᠮᠣᠩᠭᠣᠯ ᠪᠢᠴᠢᠭ ᠢᠶᠡᠨ ᠮᠡᠳᠡᠳᠡᠭ ᠦᠭᠡᠢ ᠡᠴᠡ ᠪᠣᠯᠣᠯᠠ ᠭᠡᠵᠦ ᠪᠣᠳᠣᠶᠠ᠃︽ ᠬᠡᠯᠮᠡᠭᠳᠡᠭᠦᠯᠬᠦ︾ ᠭᠡᠵᠦ ᠬᠠᠴᠢᠨ ᠦᠭᠡ ᠪᠤᠢ᠃︽ ᠬᠡᠯᠮᠡᠬᠦ᠂ хэлмэх,гэлмэх︾ ᠨᠢ ᠠᠶᠤᠬᠤ᠂ ᠰᠣᠴᠢᠬᠤ ᠭᠡᠰᠡᠨ ᠤᠳᠬᠠ ᠲᠠᠢ᠃ ᠠᠶᠤᠭᠳᠠᠭᠤᠯᠬᠤ᠂ ᠰᠣᠴᠢᠭᠳᠠᠭᠤᠯᠬᠤ ᠭᠡᠵᠦ ᠶᠠᠷᠢᠳᠠᠭ ᠦᠭᠡᠢ᠃ ᠠᠶᠤᠬᠤ᠂ ᠰᠣᠴᠢᠬᠤ ᠳᠤ ᠬᠦᠷᠭᠡᠬᠦ ᠶᠢ ᠨᠢ︽ ᠬᠡᠯᠮᠡᠭᠦᠯᠬᠦ︾ ᠭᠡᠳ ᠪᠣᠯᠣᠭᠠ ᠪᠢᠰᠢ ᠦᠦ᠃ ᠲᠠᠲᠠᠭᠰᠠᠨ ᠠᠴᠠ ᠪᠣᠯᠵᠤ ᠪᠠᠭᠤᠬᠤ ᠶᠢ︽ ᠲᠠᠲᠠᠭᠳᠠᠨ ᠪᠠᠭᠤᠬᠤ︾ ᠭᠡᠬᠦ ᠶᠣᠰᠣᠲᠠᠢ ᠪᠠᠢᠲᠠᠯᠠ︽ ᠲᠠᠲᠠᠨ ᠪᠠᠭᠤᠭᠳᠠᠬᠤ︾ ᠭᠡᠵᠦ᠂ ᠦᠢᠯᠡ ᠦᠭᠡᠨ ᠦ ᠪᠡᠨ ᠲᠤᠰᠬᠤ᠂ ᠡᠰᠡ ᠲᠤᠰᠬᠤ ᠶᠢᠨ ᠤᠴᠢᠷ ᠢ ᠣᠯᠬᠤ ᠦᠭᠡᠢ ᠪᠤᠳᠤᠯᠢᠵᠤ ᠪᠠᠢᠳᠠᠭ᠃ ᠪᠢᠳᠡ ᠪᠠᠷᠠᠭᠠ ᠶᠢ ᠪᠣᠷᠣᠯᠠᠭᠤᠯᠤᠨᠠ᠂ ᠪᠠᠷᠠᠭᠠ ᠨᠢ ᠪᠣᠯᠪᠠᠯ ᠪᠣᠷᠣᠯᠠᠨᠠ᠂ ᠪᠠᠷᠠᠭᠠ︽ ᠪᠣᠷᠣᠯᠠᠭᠳᠠᠨᠠ︾ ᠭᠡᠵᠦ ᠬᠡᠯᠡᠬᠦ ᠶᠣᠰᠣ ᠦᠭᠡᠢ᠃
ᠨᠡᠷᠡ ᠦᠭᠡ᠂ ᠦᠢᠯᠡ ᠦᠭᠡ ᠶᠢᠨ ᠰᠠᠩ ᠢᠶᠠᠨ ᠠᠭᠤᠳᠠᠯᠵᠤ ᠴᠢᠳᠠᠬᠤ ᠦᠭᠡᠢ᠂ ᠦᠭᠡ ᠪᠦᠲᠦᠭᠡᠬᠦ ᠪᠣᠯᠣᠮᠵᠢ ᠪᠠᠨ ᠠᠰᠢᠭᠯᠠᠬᠤ ᠦᠭᠡᠢ ᠪᠣᠯ᠂ ᠭᠠᠳᠠᠭᠠᠳᠤ ᠦᠭᠡ ᠪᠡᠯᠡᠨᠴᠢᠯᠡᠵᠦ ᠠᠪᠤᠭᠠᠳ ᠯᠠ ᠰᠠᠭᠤᠨᠠ᠃ ᠭᠠᠳᠠᠭᠠᠳᠤ ᠦᠭᠡ ᠪᠡᠨ ᠤᠬᠠᠭᠠᠨ ᠢ ᠨᠢ ᠣᠯᠵᠤ ᠬᠡᠷᠡᠭᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯ᠂ ᠲᠡᠭᠡᠭᠡᠳ ᠬᠡᠯᠡ ᠦᠭᠡᠢ ᠪᠣᠯᠬᠤ ᠶᠤᠮ ᠪᠢᠵᠡ᠃